చర్మ క్యాన్సర్‌కు చెక్.. తిరిగి రాకుండా అడ్డుకుంటున్న కొత్త వ్యాక్సిన్

క్యాన్సర్ చికిత్సా రంగంలో సరికొత్త ఆశలను రేకెత్తిస్తూ, ప్రముఖ ఫార్మా సంస్థలు మోడెర్నా, మెర్క్ కీలక విష‌యాన్ని వెల్ల‌డించాయి. ఈ సంస్థలు సంయుక్తంగా అభివృద్ధి చేస్తున్న వ్యక్తిగత mRNA క్యాన్సర్ వ్యాక్సిన్ (ఇంటిస్మెరాన్ ఆటోజీన్ లేదా mRNA-4157), ఫేజ్ 3 క్లినికల్ ట్రయల్స్‌లో అద్భుతమైన ఫలితాలను సాధించినట్లు ప్ర‌క‌టించాయి. తీవ్రమైన చర్మ క్యాన్సర్ (మెలనోమా) రోగులలో క్యాన్సర్ తిరిగి రాకుండా, ఇతర అవయవాలకు వ్యాపించకుండా నిరోధించడంలో ఈ వ్యాక్సిన్ మంచి ఫ‌లితాల‌ను చూపించిందని కంపెనీలు తెలిపాయి.

ట్రయల్స్ వివరాలు.. ఫలితాలు
INTerpath-001 పేరుతో నిర్వహించిన ఈ ఫేజ్ 3 అధ్యయనంలో శస్త్రచికిత్స ద్వారా క్యాన్సర్ కణితులను పూర్తిగా తొలగించుకున్న 1,137 మంది రోగులు పాల్గొన్నారు. వీరందరూ స్టేజ్ IIB నుంచి IV వరకు ఉన్న అధిక ప్రమాదకర మెలనోమా బాధితులు. ఈ రోగులను రెండు బృందాలుగా విభజించి, ఒక బృందానికి ప్రస్తుతం వాడుకలో ఉన్న ఇమ్యునోథెరపీ మందు 'కీట్రూడా' (పెంబ్రోలిజుమాబ్)తో పాటు కొత్త mRNA వ్యాక్సిన్‌ను ఇచ్చారు. మరో బృందానికి కేవలం కీట్రూడా మందును మాత్రమే అందించారు.

వ్యాక్సిన్, కీట్రూడా కాంబినేషన్ తీసుకున్న రోగులలో, కేవలం కీట్రూడా తీసుకున్న వారితో పోలిస్తే క్యాన్సర్ పునరావృతం అయ్యే ప్రమాదం గణనీయంగా తగ్గిందని పరిశోధకులు గుర్తించారు. అలాగే, క్యాన్సర్ శరీరంలోని ఇతర భాగాలకు వ్యాపించే (డిస్టెంట్ మెటాస్టాసిస్) ముప్పు కూడా తగ్గిందని నిర్ధారించారు. ఈ ఫలితాలు గణాంకపరంగా, వైద్యపరంగా ఎంతో ముఖ్యమైనవని కంపెనీలు పేర్కొన్నాయి. పూర్తి వివరాలతో కూడిన నివేదికను, ముఖ్యంగా రోగుల మనుగడకు సంబంధించిన పూర్తి డేటాను రాబోయే వైద్య సమావేశంలో సమర్పించనున్నట్లు తెలిపాయి.

వ్యాక్సిన్ ఎలా పనిచేస్తుంది?
ఈ వ్యాక్సిన్ ప్రత్యేకత ఏమిటంటే.. ఇది ప్రతి రోగికి ప్రత్యేకంగా తయారు చేయబడుతుంది. అందుకే దీనిని 'పర్సనలైజ్డ్ వ్యాక్సిన్' అని పిలుస్తారు. ముందుగా రోగి శరీరం నుంచి శస్త్రచికిత్స ద్వారా క్యాన్సర్ కణితిని తొలగిస్తారు. అనంతరం ఆ కణితిపై జన్యు విశ్లేషణ చేసి, కేవలం క్యాన్సర్ కణాలకు మాత్రమే ప్రత్యేకమైన జన్యు మార్పులను (నియోయాంటిజెన్‌లు) గుర్తిస్తారు. ఈ జన్యు సమాచారం ఆధారంగా ఒక mRNA వ్యాక్సిన్‌ను రూపొందిస్తారు.

ఈ వ్యాక్సిన్‌ను రోగికి ఇచ్చినప్పుడు, అది వారి రోగనిరోధక వ్యవస్థకు ఒక శిక్షకుడిలా పనిచేస్తుంది. శరీరంలోని టీ-కణాలకు, క్యాన్సర్ కణాలను కచ్చితంగా గుర్తించి, వాటిపై దాడి చేసి నాశనం చేసేలా శిక్షణ ఇస్తుంది. దీనికి తోడుగా ఇచ్చే కీట్రూడా మందు, రోగనిరోధక వ్యవస్థపై ఉండే సహజమైన అడ్డంకులను తొలగించి, అది మరింత చురుగ్గా పనిచేసేలా చేస్తుంది. ఈ రెండు కలిపి పనిచేయడం వల్ల క్యాన్సర్‌పై పోరాటం మరింత ప్రభావవంతంగా మారుతుంది.

ప్రస్తుతానికి ఈ థెరపీ ఇంకా పరిశోధన దశలోనే ఉంది, ప్రజల వినియోగానికి ఆమోదం లభించలేదు. చర్మ క్యాన్సర్‌తో పాటు ఊపిరితిత్తుల క్యాన్సర్, కిడ్నీ క్యాన్సర్, బ్లాడర్ క్యాన్సర్ వంటి ఇతర క్యాన్సర్‌లపై కూడా ఈ వ్యాక్సిన్ పనితీరును పరీక్షించేందుకు ట్రయల్స్ కొనసాగుతున్నాయి. ఈ ప్రయోగం విజయవంతం కావడం వ్యక్తిగత క్యాన్సర్ చికిత్సల అభివృద్ధిలో ఒక చారిత్రాత్మక ముందడుగుగా వైద్య నిపుణులు భావిస్తున్నారు.